Wayang Golek Milangkala Bogor di Kalurahan Semplak

Runtuyan kagiatan mièling milangkala Bogor ka 533, masih kènèh terus lumangsung diantarana pagelaran  wayang golèk sapeuting jeput di Pangkalan Batu, Kalurahan Semplak Kacamatan Bogor Barat, Saptu (7/6). Anu minton di tempat ieu, Dalang Perasatuan Pedalangan Indonesia (Pepadi) Kota Bogor, Ki Dalang Zakir Ismail mawakeun carita Prabu Milwuka Sakti.

Numutkeun Kepala Dines Kabudayaan Pariwisata jeung Ekonomi Kreatif (Disbudparekraf) Kota Bogor anu ogè Pupuhu Pepadi, H. Shahlan Rasyidi, pagelaran wayang golèk dina raraga milangkala Bogor ieu, dilaksanakeun di 6 Kacamatan.

“Wengi ieu Sabtu ping 6 Juni 2015 di Kacamatan Bogor Barat, kalayan dalangna Ki Dalang Zakir,  wengi enjing Ahad ping 7 Juni di Kalurahan Genteng Kacamatan Bogor Selatan bakal minton Ki Dalang Jajat sareng Dalang Maulana,”sanggemna basa muka pagelaran. Inyana ogè negeskeun pintonan wayang golèk anu geus jadi acara matuh Pemkot Bogor unggal taun hususna dina mièling milangkala Bogor, minangka bukti yèn Pamarèntah Kota Bogor kacida merhatikeunna kana kamekaran seni tradisi hususna wayang golèk anu dikokolakeun ku Dines Kabudayaan, Pariwisata jeung Ekonomi Kreatif Kota Bogor.  Acara ieu dibuka ku masrahkeun gugunungan ti Camat Bogor Barat, Irwan Gumelar ka Ki Dalang Zakir di  luhur panggung.

Sawatara èta, salah saurang panongton anu ogè warga satempat, Eeng Gunawan, nu narongton pagelaran wayang golèk, kacida noyèkna,  ti mimiti barudak, rumaja nepi ka anu umurna geus teu ngarora deui.

“Salila ieu masarakat  di dieu ukur lalajo dina telepisi ayeuna mah katempo pisan kumaha rupa jeung wandana wayang golèk,”pokna daria.  Salian ti Lurah Semplak Udin Syamsudin jeung rèngrènganna, nyampak ogè  Lurah Situgede, Junaedi para pajabat ti Disbudparekraf Kota Bogor, Kacamatan Bogor Barat  sarta  inohong masarakat satempat. (Dadang HP)