Saptu Isukan Situgede Bakal Pinuh ku Getek

Kagiatan mièling milangkala Bogor ka 533, Kalurahan Situgedè Kacamatan Bogor Barat, Kota Bogor, bakal dipungkas ku Ngubek Setu dina poè Ahad, 14 Juni anu bakal datang. Tapi samèmèhna bakal aya Lomba Ngawelah  Gètèk  pikeun tingkat RW dina poè  Saptu (13/6) isukan. Numutkeun pupuhu panitia anu ogè pupuhu LPM Situgedè, Eman Sulaeman, sakurangna bakal aya 10 gètèk anu miluan dina kagatan ieu. Tapi lamun sa-RWna aya dua , Situgedè bakal pinuh ku7 gètèk, sakurangna aya 20 gètèk anu bakal miluan. 

“Pikeun waragad nyieun gètèkna dirèang-rèang ku masarakat, sabab panitia mah teu bisa nyadiakeun duit,”pokna ka WartaBasaSundaBogor (WBSB) di sisi sètu. Masih ceuk Eman, dina peuting ieu, para inohong masarakat, RW, RT jeung LPM bakal ngalaksanakeun do’a babarengan, mènta kasalametan ka Nu Maha Murbeng Alam, Allah SWT. Salian ti èta, ngadu’a sangkan lauk anu aya di Situgedè beunang diala ku para pamilon ngubek sètu.

“Panitia mah miharep pisan sangkan nu milu ngubek sarugema mareunang lauk,”pokna daria. Sawatara gètèk anu dipakè lomba dina poè Saptu, bakal disèwakeun ka para pamilon ngubek sètu, harga sèwana kumaha kusupakatan warga. Pikeun karcis anu ngubèk, hargana Rp 50 rèbu sa-jalana. Lamun dina gètèk aya dua jala, nya kudu meuli dua tikèt atawa mayar Rp 100 rèbu.

“Hadiah pikeun Lomba gètèk disadiakeun ku pihak sponsor nyaèta kumpulan dealer motor Honda anu ti Bandung,”teges Eman.

Rengrengan LPM jeung RW-RT Kel, Situgede mangsa keur rapat