Bupati Purwakarta, H. Dedi Mulyadi, SH mastikeun bakal ngirim tim kesenian ka pagelaran jeung
helaran dina raraga mièling milangkala Bogor ka 533 anu bakal lumangsung ti mimiti bulan Mei nepi
ka Juni 2015. Hal èta ditegeskeun Dedi di kantorna, mangsa narima Kepala Dines
Kebudayaan, Pariwisata jeung Ekonomi Kreatif (Disbudaparekraf) Kota Bogor, H. Shahlan
Rasyidi anu datang dibarengan ku event organizer (EO), Nanang, Senen (13/4).
“Insya Allah, sanes mung tim kasenianna wungkul, upami aya
uleman mah, sim kuring ogè siap ngaluuhan cara milangkala di Kota Bogor,”sanggemna.
Sawatara èta, Kadisbudparekraf Kota Bogor negeskeun ku ayana kasiapan Pemkab.
Purwakarta ngirimkeun tim kasenianna, dipastikeun milangkala Bogor ka 533 bakal
leuwih euyeub jeung ramè tibatan milangkala samèmèhna. Sabab balarèa ogè apal
pisan kumaha ketak Bupati Purwakarta ieu dina ngamumulè Budaya Sunda. Salah
sahiji cirina, nyaèta kaayaan kantorna anu heuyeub pisan ku ciri-ciri
kasundaan.
“Malah sadidinten ogè, anjeunna katut para kepala dèsana teu
tara leupas tina iket, raksukan Sunda. Kitu ogè dina nyariosna, tara leupas
tina basa Sunda,”saurna. Acara milangkala Bogor, sakurangna bakal dieusi ku
rupa-rupa kagiatan, salian ti mintonkeun rupa-rupa kasenian Sunda, ogè bakal
dieusi ku kasenian ti 7 provinsi. Dina hèlaran anu bakal dilaksanakeun dina
Saptu, 30 Mei 2015, bakal dipintonkeun mobil hias ti 68 kalurahan, 6 kacamatan,
SKPD sarta ti pihak swasta.
“Dongkapna sim kuring ngadeuheus ka Bupati Purwakarta, salah
sawiosna pikeun ngulem mantenna dina acara milangkala Bogor anu ka 533,”tegesna.
(Dadang HP)
sae pisan tah kang..
BalasHapus