Ngamangpaatkeun Pasar Budaya di Kemuninggading

Pasar Budaya anu dilumangsungkeun di Gedong Kamuninggading, ti mimiti Salasa nepi ka Kemis (7-8 April 2015) hasil gawè bareng Kantin Bioskop Keliling jeung Dines Kabudayaan, Pariwisata jeung Ekonomi Kreatif (Disbudaparekraf), salian ti ngalaksanakeun pamuteran film animasi ngeunaan Sajarah Bogor, ogè dipapaès ku pamèran rupa-rupa barang,  salah sahijina stand pakèan  Sunda jeung rinèka pamaès. Numutkeun Yadi anu sapopoèna muka kios di Jalan Otista-Pasar Bogor, teu jauh ti Panto Gerbang asup Kebon Raya Bogor, salila pamèran meunang hasil anu kawilang lumayan. Ngan basa disedek-sedekku WSS, sabaraha panghasilanna salila tilu poè èta, inyan teu daèk ngajelaskeun.

“Alhamdulillah  kang, teu kedah disebatkeun sabaraha jumlahna. Akang ogè terang anu darongkapnapan barudak sakola,”ceuk Yadi anu sapopoèna teu pernah leupas tina iket atawa totopong. Nu penting, tegesna, barudak sakola anu tadina teu wanoheun kana pakèan Sunda, boh totopong, kamprèt atawa pangsi jadi arapaleun. Salian ti ngajual pin kujang, rarangkèn leungeun,  Yadi ogè nyieunan kaos anu gambarna ngeunaan situs-situs anu aya di Bogor, diantarana Situs Batutulis jeung Prasasti Ciaruteun.

“Lumayan nepi ka wangkid kiwari geus aya nu pesen, boh ti Kota atawa Kabupatèn,”pokna daria. Yadi kungsi ngalaman meunang panghasilan anu rada lumayan, mangsa di Kota Bogor, dimimitian Program Rebo Nyunda. Ngan saentas èta, panghasilanna balik deui sakumaha biasana. Tapi sanajan kitu, inyana jangji moal incah balilahan pindah barang jual nu lian.

“Nu penting Sunda bisa nanjeur boh seni jeung budayana, kaasup pakèan.  Sabab lamun taya nu nyadiakeun dagangan anu aya patalina jeung Kasundaan, sok sieun urang Sunda poho kana jatidirina,”teges Yadi. (Dadang HP)