Kepala SDN Polisi 4 Nyiptakeun Lagu Biopori

Yo .. ayo...  kita semua belajar menghitung ruas volume tabung

 Hitung luas alasnya, lalu dikalikan dengan tingginya

Jangan lupa  eh – eh Bioporinya ... dst

Padalisan di luhur mangrupa sabagian tina kawih Lubang Resapan Biopori anu unggal waktu dinyanyikeun ku barudak SDN Polisi 4 Kota Bogor.  Lagu ciptaan Kepala SDN Polisi 4 Yayah Komariah ngahaja diajarkeun ka murid-muridna pikeun panyumanget mangsa keur nyieun liang biopori. Numutkeun Yayah, lagu èta ngandung harti anu kacida jerona, salian ti ngadidik barudak sangkan nyaah ka wewengkonna ogè raket patalina jeung pangajaran anu diajarkeun di sakola.

“Jadi mangsa barudak nyieun liang biopori anu lebarna 10 sentimeter sarta jerona 20 sentimeter, barudak kalayan teu langsung ogè diajar matematika,” sanggemna.  Satuluyna, ceuk Yayah, liang ieu diasupan runtah baseuh, diantepkeun lilana sabulan, bakal jadi kompos, pikeun pupuk. SDN Polisi 4 sorangan nepi ka danget ieu geus nyieun sakurangna 50 liang biopori di sisi wahangan Cipakancilan di Kalurahan Paledang Kacamaan Bogor Tengah.  

Inyana ogè negeskeun yèn lamun ngan saukur nyieun liang biopori wungkul bari  jeung teu diurus sarta teu dieusian ku runtah baseuh, kurang pati aya gunana. Saentas sabulan inyana nyaritakeun engkè bakal panèn pupuk kompos.

“Kagiatan ieu minangka pangwujudan  tina program #bogohkaBogor anu dihangkeutkeun ku Bapa Walikota Bogor,”tegesna. Yayah  miharep program #Bogoh ka Bogor, lain ngan saukur babasan jeung wawacan wungkul, tapi bener-bener dilaksanakeun. Di SDN Polisi 4 sorangan geus lila dipraktekeun LISA singgetan tina Lihat Sampah Ambil, ngamangpaatkeun barang-barang kurut anu geus kapakè jadi anu aya mangpaatna, ngumpulkeun  minyak jalantah pikeun biodesel sarta ngalaksanakeun “penghijauan” di sakolana. Program ieu, saurna,  saluyu jeung  harepan Pemkota Bogor dina ngajaga kabersihan, sarta ngokolakeun taman kota (Iso/Dadang HP)