Tarekah Ngamangpaatkeun Lawon Sesa

WartaBasaSunda.

Lawon  sèsa ngajait atawa perca, tètèla bisa dimangpaatkeun tur bisa nambahan panghasilan kulawarga. Salah sahijina sakumaha anu lumaku di bumi Ketua RW 08 Kampung Buntar, Kelurahan  Muara Sari, Kota  Bogor.  Ketua TP PKK Kota Bogor Hj. Yane Ardian terjun langsung ngalatih  ibu-ibu pamilon program P2WKSS, pikeun nyieun bros tina bahan lawon-lawon  sèsa.  Inyana miharep kahareupna, Kampung Buntar bisa jadi Kampung Perca, kusabab loba wargana nu ngamangpaatkeun pamiceunan lawon jadi barang-barang anu ngahasilkeun duit. “Jadi anu biasana ku tukang jait dipiceunanm ayeuna mah bisa dijieun barang-barang anu aya hargaan,”sanggem Yane. Sawatara èta,  Kepala BPMKB Kota Bogor, Fety Qondarsyah nètèlakeun yèn  ibu-ibu warga Kampung Buntar bisa latihan kaparigelan nu lianna, disaliyukeun jeung kahayang tur potensi anu aya di wewengkonna.  Nu pangpentingna, ceuk Fety, kaum ibu bisa macakal jeung nambahan panghasilan kulawargana. Kagiatan anu dialpukahan ku BPMKB Kota Bogor ieu disaksian ku Lurah Muarasari, Daden Hidayat sarta Ketua TP PKK Kecamatan djeung  Kelurahan.(Humas/dhp)