Helvy Maryand, Naratas Kahirupan Anyar di Lembur Bali geusan Ngajadi

Tadina mah teu nyangka sacongo buuk ogè lamun Helvy Maryand , anu ngawihkeun Sorba Palid, Bangbungranggaek, Manuk Dadali jeung Mas Joko Tak Uu sarta nu pamungkas Tuhan Jagakan Dia, bibit buitna ti Kampung Warung Borong, Kacamatan Ciampea Kabupaten Bogor. Helvy, kungsi kakoncara mangsa album mimitina, Sorban Palid kajual nepi ka sajuta siki. Ti dinya, salila 30 taun, dumuk di Bekasi sarta hirup macakal di Jakarta. Salian ti ngawih, inyana ogè remen maèn sinètron, diantarana dina Si Buta Gua Hantu, anu dibèntangan ku Hadi Leo. jadina  pamajikanna Wiro Sablengna Kenken. Saentas pangsiun tina kagiatan èta, Helvy balik sarta ngarereb di Bogor, pikeun ngamajukeun budaya Sunda.

“Dalah dikumaha ogè getih nu aya dina diri kuring tèh getih Sunda, aya ku payus pisan mun kuring ancrub ngagedèkeun Ki Sunda. Sabab geuning budaya Sunda tèh kadèsèh ku budaya deungeun, jati kasilih ku junti,”pokna ka WBSB, mangsa keur nganjang ka PWI Kota Bogor, Rebo (2/9). Salah sahiji anu keur digarapna nyaèta ngalumangsungkeun “Lomba Paduan Suara “pikeun guru-guru sa-Kota Bogor, kalayan lagu wajibna Bogoh ka Bogor, sarta lagu pilihanna, Sorban Palid, Bangung Ranggaèk sarta Manuk Dadali. Pikeun mirigna, kumaha kahayang pamilon, bisa ku hitar, gamelan atawa kacapi, kumaha kaparigelan sèwang-sèwangan.

“Tah hadiahna aya artos kadeudeuh ti Dines Pendidikan jeung Disbudparekraf Kota Bogor, salian ti piagam tèh ogè bakal diajak damel sareng DMP Poduction,”sanggemna. Sangkan ramè,inyana ngajak RRI, DK3B, Radio Sipatahunan  tur PWI Kota Bogor.Pikeun pangdaftaranna bisa datang ka RRI Bogor di Jalan Pangrango 20  sarta  Sekretariat Dewan Kesenian, Kebudayaan Kota Bogor di Gedung Kemuning Gading Komplek Pemkot Bogor Jalan Kapten Muslihat Kota Bogor ti mimiti poè ayeuna, Kemis (3/9). (dhp)