Moh Hamzen : KML Kwarcab Kota Bogor Lilana 6 Poe

WartaBasaSunda. TAJURHALANG. Pupuhu Kwarcab Gerakan Pramuka Kota Bogor, Ade Sarip Hidayat, negeskeun yèn dunia atikan (pendidikan) jeung Pramuka, teu bisa dipisahkeun, lir cai jeung laukna. Kusabab kitu Gerakan Pramuka kudu tetep hirup nyaangan hate  barudak sakola, guru jeung sakumna nu kalibet dunya pendidikan. Hal èta ditegeskeun Adè mangsa muka kagaitan Kursus Mahir Lanjutan (KMP) Tingkat Penggalang taun 2015  anu diayakeun ku Kwarcab Kota Bogor, di Desa Tajur Halang Kacamatan Cijeruk, Kabupatèn Bogor. Di hareupeun para pamilon KML anu rata-rata kapala sakola inyana negeskeun sangkan dina ngalaksanakeun kagiatan Pramuka di dasaran ku rasa ihlas,hayang ngamajukeun kapramukaan di Kota Bogor.

Moh. Hamzen, M.Si

“Omat Pramuka mah lain pikeun nèangan duit, tapi  pikeun pangabdian,”tegesna. Minangka  ciri yèn kagiatan KML dimimitian, sabada bèantara Adè anu ogè Sekda Kota Bogor, masrahkeun pataka ka salah saurang paanitia sarta masangkeun pin ka para  pamilon. Sawatara èta, Pupuhu  Palaksana Kagiatan, Moh. Hamzen nyaritakeun yèn KML anu dilaksanakeun dina taun 2015 ieu, dipiluan ku  30 urang pamilon sarta diwaragadan tina anggaran Kwarcab Kota Bogor.

“Sa Kwartir Ranting ngirimkeun pamilon lobana 5 urang. Sarta saratna geus miluan KMD sakurangna 6 bulan bari geus nyieun Nalakarya, nyaèta tulisan jeung kagiatan anu geus dilaksanakeun salila 6 bulan katukang,”saurna. Kwarcab. Kota Bogor sorangan nepi  danget ieu geus ngahasilkeun  800  urang leuwih Pembina anu miluan KMD tina target 1000 urang. Sedengkeun pikeun Pembina anu geus miluan Kursus Pelatih Dasar (KPD) di tingkat Kwarda aya 36 urang.  Sarta nu geus miluan Kursus Pelatih Lanjutan di Kwarnas aya 16 urang.

“Allhamdulilllah mangsa Pa Ade Sarip mingpin Kwarcab Kota Bogor dina waktu ukur 3 taun, Kwarcab Kota Bogor jadi Kwarcab Panggiat ka 3, anu samèmèhna ka 22 tina 24 Kwarcab anu aya di Jawa Barat,”pokna tatag. (Dadang HP)

 

 

Rachmat Saujana :Soal Kampung Urug, Disbudpar Bakal Neangan Jalan Kaluarna

Patali jeung kereteg hate  salah sahiji kasepuhan Kampung Urug Tonggoh, Desa Urug Kacamatan Sukajaya Kabupatèn Bogor, Abah Sukardi  anu nyebutkeun yèn kampung budaya ieu geus kaleungitan jatidirina, kusabab para kokolot lianna geus ninggalkeun tali paranti  karuhun dina urusan tatanèn, Dinas Kebudayaan jeung Pariwisata Kabupatèn Bogor bakal nyieun lèngkah pikeun ngungkulanna. Hal èta ditegeskeun ku Kepala Disbudpar Kabupatèn Bogor Rachmat Saujana di kantorna sababaraha waktu kaliwat.

“Sim kuring bakal nyawalakeun heula jeung para kokolot di Kampung  Urug sarta umajak Dines Tata Ruang Bangunan jeung Pamukiman sarta Dines Pertanian jeung Kehutanan Kabupatèn Bogor pikeun nèangan jalan kaluarna,”ceuk Rachmat. Malah leuwih jauhna Rachmat bakal ngusulkeun sangkan dijieun Perbub pikeun wangunan anu aya di Kampung Urug, kitu ogè  patali jeung  dunya tatanèn rèk dijieun Perbupna sangkan binih pare anu aya di Kampung Urug henteu sirna.

“Perbup pikeun wangunan ayana di Dines Taruba jeung Pemukiman, sedengkeun ngeunaan tatanèn atawa plasma nuftah kawenangan Dines Pertanian jeung Kehutanan Kabupatèn Bogor. Insya Allah sim kuring bakal sawala jeung dua dines èta,” pokna daria. Salian ti èta, sangkan sakabèhna bisa jalan saluyu jeung kahayang tangtuna kudu ngajak Pemda satempat boh aparat ti Desa Urug atawa ti Kacamatan Sukajaya. Inyana yakin ku ayana Perbub-perbub ieu, Kampung Urug bisa disalametkeun sarta kahareupna tetep jadi kareueus urang Bogor.

“Titinggal kahirupan karuhun urang Sunda anu masih aya di Kabupatèn Bogor,ukur Kampung urug, nyaah kacida  lamun nepi ka leungit,”tegesna.  

  

Kepala Disbudpar Kab. Bogorm Rachmat Saujana

SMP PGRI 2, Sakola Swasta Pinunjul dina LTUB

Prestasi nyugemakeun ditembongkeun ku SMP PGRI Bogor Timur, sabab ngan hiji-hijina sakola swasta anu bisa jadi juara dina Lomba Tata Upacara Bendera (LTUB) tahun 2015  tingkat SMP sa-Kota Bogor. SMP anu dipingpin kua  Yayat “Odoy” Hidayat ieu, geus bisa ngèlèhkeun sakola nagri lianna. Hal ieu dicaritakeun ku inyana, basa narima piala di buruan Dines Pendidikan Kota Bogor  di Jalan Pajajaran Kota Bogor, Rebo (30/9).

 “Sakola kuring mah lapangan upacarana ogè heurin kacida, dukdek lamun ngayakeun upacara bandera tèh. tapi Alhamdulillah ku jadi juara ka tilu ogè geus mangpirang-pirang,”ceuk Yayat. Pikeun ngungkulan kakurangan èta, LTUB di SMP PGRI 2 ditambahan ku pirigan corsic. Sawatara pikeun  juara kahiji jeung kaduana direbut ku SMP Negeri 2 jeung SMP Negeri 1.  Sedengkeun tingkat SMA direbut ku SMAN 6 (juara 1), juara ka dua, SMAN 3 sarta katiluna beunang ku SMAN 2. SMKN 2 ngarebut tempat kahiji, SMKN 4 jeung SMKN 1 meunang tempat ka tilu dina tingkat SMK. Salian ti meunang tropi, para pinunjul LTUB ogè meunang waragad pangbinaan anu gedèna, Rp 2.500.000 juara ka hiji, nu kadua Rp 1.500.000 sarta Rp 1.250.000 pikeun juara III.

"Pikeun pinunjul kahiji8 bakal dipersiapkeun milluan LTUB tingkat provinsi   dina bulan Nopember nu bakal datang,” ceuk  Teddy Kuanadi ketua pelaksana kagiatan.(Br/DHP)

Abah Sukardi : Kampung Urug Geus Kaleungitan Jatidirina

Wartabasasunda. SUKAJAYA. Kokolot  Kampung Adat Urug Tonggoh, Desa  Urug Kacamatan Sukajaya Kabupaten  Bogor, Abah Sukardi meredih ka Pamarentahan Kabupaten Bogor sangkan ilubiung langsung ngabenahan Kampung Urug anu geus kaleungitan jatidirina. Hal ieu dijèntrèkeunna  basa WBBS nganjang ka imahna di Kampung Urug Tonggoh, Desa  Urug Senen (29/9).  Malah ceuk Abah Sukardi, papan ngaran Kampung Adat Urug anu dipasang di sisi jalan asup ka kampungna dicabut, sabab Kampung Urug kiwari  sarua jeung kampung lianna.

“Tong boroning jadi kokolot kuring mah, jadi wargana ogè èra, ku ayana papan ngaran di hareup tèh, Sim kuring meredih ka Pamarèntah Kabupatèn Bogor, sacepetna turun ka Kampung  Urug pikeun ngabebenah sangkan bisa balik deui ka jati dirina, dunya tatanèn,” tegesna. Pangna Kampung Urug dijadikeun kampung adat, ceuk Abah Sukardi, kusabab karuhun baheula nyekel adat jeung aturan kana urusan tatanèn, saluyu jeung sajarah atawa kasangtukangna. Sumber sajarah Kampung  urug sakumaha remen dicaritakeun ku  karuhunna, kaasup ayeuna dirina, teu bisa leupas ti Nyi Pohaci, putra kakasihna Eyang Prabu (Siliwangi?) anu mimiti kareseban dina poè Jumaah sarta kakara kanyahoan dina poè Ahad, tur getih èta dibanjur sarta ragrag kana taneuh dina poè Senèn. Ti riwayat èta, aya aturan anu kudu dijalankeun ku sakabèh warga Kampung Urug diantarana teu meunang ka sawah jeung ngomè pare dina Jumaah, Ahad jeung Senèn.  Mangsa  Nyi Pohaci pupus, dina sababaraha tempat aya bijil tatangkalan anu diantarana jadi binih pare anu dipelakkeun di sakuliah Kampung Urug.

“Lamun kokolotna waè geus ngarumpak aturan, tunggul  dirarud catang dirumpak dina urusan tatanèn, naon anu dipikareueus di Kampung Urug atuh,” pokna daria. Inyana ogè kacia manghanjakalkeun ka sikep kokolot  Kampung Urug lianna, anu geus teu miara tali paranti karuhunna, diantarana teu meunang ngagiling pare, sabab aturanna kudu ditutu, masih kènèh ngomè pare dina poè-poè anu dipahing, teu daèk melak pare babarengan ogè binih pare baheula diantarana Sri Kuning, Pare Beureum Cempa, Kewal, Raja Wesi, Limar sarta  Ketan Gado anu umurna  saluhureun 5  nepi ka  7 bulan.

“Lantaran hayang panèn dua nepi ka tilu kali kalah der melak pare varitas anyar. Balukarna katempo pisan. Mangsa keur sok melak pare warisan, urang Kampung Urug tara pernah kakurangan bèas, Ayeuna mah pan bèas raskin ogè mani parebut,”sanggemna deui.  Pikeun miara adat anu geus mangratus-ratus taun aya, tur ayeuna geus mimiti ditaringgalkeun, Abah Sukardi mènta sangkan Kampung Urug dijadikeun puseur tatanèn jeung pangwinihan pare baheula, sakumaha anu dilaksanakeun di Kabupatèn Cianjur anu ngawajibkeun sababaraha tempat melak pare jinis Pandan Wangi sarta nu lianna. Sawatara èta Kokolot Cipatat Kolot anu ogè masih rèrèhan ti Kampung Urug nyebutkeun lamun dirina angger mituhu  kana aturan anu geus diwariskeun ku karuhunna.

“Kuring mah sieun pisan lamun kudu ngarumpak aturan tèh. Salah sahijina di imah kuring mah pare salawasna ditutu teu pernah dibawa ka tempat heuleur pikeun digiling, sieun dihukuman ku karuhun,”jawabna  daria. Ayana ka teu cocokan diantara para kokolot di Kampung Urug diaku Sekdesna, Candra. Numutkeun Candra pihak Pamarèntahan Desa Urug anu dipingpin ku Ata Iskandar geus pernah ngariungkeun para kokolot di kantir dèsa diantarana sangkan melak pare babarengan jeung pare anu sakumaha biasa dipelak.

“Mangsa ngariung mah enya rèk tuhu, tapi dina praktèkna mah gumantung kana kahayang kokolot èta, pakia-kia jeung anu geus dimusawarahkeun,” ceuk Candra. Inyana ogè minangka generasi ngora ngarasa kacida hariwangna kana ayana pasualan kitu, sabab geus pasti kahareupna sakabèh budaya anu aya di Kampung   Urug bakal carem lamun teu buru-buru dibenahan ti ayeuna. Desa anu legana 400, 5 Ha sarta pangeusina 1507 KK atawa 5170 urang ieu, budaya tatanènna bakal tilem, padahal satengahna, kurang leuwih 200 Ha-na, mangrupa pasawahan jeung pakebonan.

“Mugia wè aya perhatosan ti Cibinong  sabab ti des amah teu dianggap pisan,”pokna mungkas carita. (Dadang HP)

Annisa jeung Alfian , Moka Pinilih Kota Bogor 2015

WartaBasaSunda. Bogor. Saèntas ngaliwatan proses pamilihan anu kawilang panjang diantarana dina peutingan final, Anissa Satriana  jeung  Alfian Nugraha  kapilih jadi Mojang-Jajaka (Moka) Kota  Bogor 2015, anu lumangsung di Gedong Kamuninggading, Sabtu peuting (19/09).  Kagiatan anu dibuka ku Walikota Bogor, Bima Arya ieu dimimitian ku pamintonan rinèka tari ti para finalis anu jumlahna 30 urang.  Dina kasempetan èta Bima,  negeskeun yèn Kota Bogor anu kakoncara Kota Wisata dina taun ieu bakal ngaresmikeun Kota Pusaka  jeung 3 taman anu aya nyaèta Taman Kencana, Taman Interaksi Sempur sarta Taman Heulang.

“Kota Pusaka jeung Taman anu ayeuna keur diwangun bakal nambahan karakter jeung identitas Kota Bogor. Salian ti èta urang Bogorna ogè kudu somèah, hade ka sèmah. Sangkan nu daratang betaheun sarta  sono pikeun datang deui,”ceuk Bima. Ku jalanan Moka ieu, sanggemna, diharepkeun bakal jadi salah sahiji cara pikeun nguatkeun di widang pariwisata sarta seni jeung budaya Bogor. Sawatara èta, Kepala Disbudparekraf Kota Bogor, Shahlan Rasyidi nètèlakeun  Mojang Jajaka anu kapilih, anu bakal maju ka tingkat Jawa Barat bisa nyeungitkeun kotana, tur bisa jadi duta pariwisata Kota Bogor.(Met/Gus/Rahmat/dadanghp)