Milangkala Bogor ka 533 Camat Tanah Sareal Nganteurkeun Langsung KTP Wargana

Kaayaan di imah kulawarga pasangan Nurlaila Effedi  jeung  Sunarwidi di Gang Menteng RT 03 RW 02 Kalurahan Kencana Kecamatan Tanah Sareal  Kota Bogor, Rebo (3/6/2015) ngadadak ramè ku tamu undangan, kaasup aparat Kalurahan sarta Kacamatan. Di buruan imahna, nyampak  tenda jeung korsi pikeun ramu undangan. Tètèla di imah kulawarga èta keur ngareuah-reuah milangkala anakna, Angga Fadillah anu umurna nincak 17 taun dina poè èta, marengan jeung milangkala Bogor anu ka 533. Mangsa keur mièling milangkalna, Angga ngarasa reuwas sabab meunang KTP munggaran anu dianteurkeun langsung ku Camat Tanah Sareal, Taufik dibarengan Lurah Kencana, Syafei R. 

“ Ieu kado anu kacida istimèwana pikeun diri kuring mangsa nincak umur 17 taun, tangtuna moal bakal kapopohokeun saumur hirup,”ceuk Angga.  Murid SMA Negeri 7 jurusan IPA kelas 11 ini ngaku kacida bagyana nampa KTP ti Camat jeung Lurah Kencana. Inyana ogè nètèlakeun teu kudu jauh-jauh ngurus  KTP ka Kantor Dinas Kependudukan  jeung  Pencatatan Sipil. Sawatara èta  indungna  Nurlaila, ngaku teu nyangka sacongo buuk ogè bakal meunang hadiah istimèwa  mangsa anakna nincak umur 17 taun dina  poè Rebo èta. Sawatara èta Camat Tanah Sareal, Taufik negeskeun pamasrahan KTP langsung KTP anu milangkalana sarua jeung milangkala Bogor aya 10 urang, sarta sakabèhna dianteurkeun ka imahna sèwang-sèwangan. Inyana ogè negeskeun yèn KTP mangrupa bagèan palayanan dasar sarta wajib dibikeun ku  Pamarèntah Kota Bogor. Sakurangna aya tilu palayanan dasar nyaèta widang kependudukan diantarnya KTP, pendidikan  jeung kasèhatan. (ISO/Dadang HP)

SDN Margajaya 1 Bakal Ngahangkeutkeun Panggunaan Aksara Sunda Ngalagena

Pikeun ngarojong program Bogoh ka Bogorna Walikota jeung Ngabogorna Dines Pendidikan Kota Bogor, hususna di budaya, SDN Margajaya 1 Kalurahan Margajaya Kacamatan Bogor Barat, bakal ngahangkeutkeun panggunaan Aksara Sunda Ngalagena atawa Kaganga di sakolana. Hal ieu dijelaskeun Kepala SDN Margajaya 1, Mochamad Hamzen mangsa ditepungan di sakola, Jumaah (5/6). Numutkeun Hamzen pikeun anu munggaran Aksara Ngalagena bakal digunakeun dina ngaran sakola, satuluyna bakal dilarapkeun di kelas. Rencana bewara ngeunaan panggunaan Aksara Kaganga ieu bakal dilaksanakeun dina tangga 15 Juni anu bakal datang. Hal ieu saluyu jeung program Rebo Nyunda anu geus dilaksanakeun ku Pemkot Bogor sababaraha bulan kaliwat.
“Program Rebo Nyunda, numutkeun salah saurang panaratasna, eusina aya tilu kagiatan nyaèta Aksara, Basa jeung Pakèn. Pikeun pakèan ayeuna mah geus rada ragem, kari basa jeung aksarana,”sanggem Hamzen. Kitu ogè ngeunaan basa, kahareupnakeun dina unggal Rebo bakal dijieun basa panganteur dina unggal mata pangajaran.

“Mudah-mudahan ku remen diajarkeun mah, barudak tèh jadi bisa sarta biasa. Sabab lamun teu dilalanyahan ayeuna rèk iraha deui,”tegesna. Inyana ogè nètèlakeun yèn guru basa Sunda di sakolana kungsi diajarkeun  kumaha carana ngagunakeun Aksara Sunda anu diayakeun ku Taboid Aksara sababaraha  waktu kalaiwat.

“Lebar pisan lamun kaahlian ieu teu diajarkeun deui ka barudak. Alusna mah dina waktu anu bakal datang aya pasanggiri nulis Aksara Sunda pikeun barudak, ambèh diajarna leuwih sumanget,”pokna daria. (Dadang HP)

Kepala SDN Margajaya Moch. Hamzen

Payung, Kampret jeung Kabaya Mieling MIlangkala Bogor di SDN Julang

Pikeun ngareuah-reuah milangkala Bogor anu ka 533, sakurangan 600 urang murid SD Negeri Julang bari dipakèan kampret, totopong jeung kabaya, ngabring bari mawa payung Saptu (30/5) kaliwat. Barudak sakola ieu ngalaksanakeun pawèy anu jauhna kurang leuwih sakilo meter, ti mimiti Jalan Julang, Jalak sarta balik deui ka Jalan Julang.  Kepala SD Negeri Julang, Indah negeskeun yèn kagiatan èta ngahaja diayakeun sangkan barudak nyahoeun yèn poè jadi Bogor tèh tanggal 3 Juni. Salian ti èta, barudak SDN Julang ti mimiti kelas 1 nepi ka kelas 6,  disina mawa payung sarta nuliskeun HJB 533 dina payungna sèwang-sèwangan..

 “Payung-payung ieu saterusna dipasang di buruan sarta di sabudeureun sakola,”tegesna. Lain ngan semet ka dinya wungkul,  Marching Band sakolana ogè minton dina acara pangbukaan Bogor Expo  di GOR Pajajaran.  Patali jeung milangkala Bogor, inyana ogè umajak ka murid-muridna, sangkan Bogor ka Bogor ku cara ngajaga kabersihan sarta teu miceun runtah sambarangan jeung kudu pinter. (Tria/Lani/Dadang HP)

Mieling HJB Gaya Dinkes Kota Bogor

Mièling milangkala Bogor anu ka 533, Dinas Kesehatan Kota Bogor, ngalumangsungkeun sosialisasi Perilaku Hidup Bersih  jeung Sehat di Lapangan Sempur Kacamatan Bogor Tengah ku jalan senam babarengan, panyuluhan  jeung  pamariksaan status iizi, HIV  sarta  konseling ngeureunan ngaroko.  Numutkeun Kepala Bidang PKM Dinkes Kota Bogor,  Dr. Ratna Junita  anu dibarengan ku Kepala Seksi Promkes Nia Kuniasih, kagiatan ieu dilaksanakeun kujalan gawè bareng jeung Puskesmas Sempur, Fema IPB, Kelurahan sarta  Instruktur Senam, Sabtu  kaliwat. Nu miluan dina kagiatan ieu, sakurangna aya 250 urang. Salian di Lapangan Sempur, Dines Kasehatan ogè umajak ka LSM No Tobbaco, AMAR jeung komunitas sèjènna ngalaksanakeun kampanyeu aimpatik ngajak masarakat sangkan ngajauhan bako. Kampanyeu mimiti dilaksanakeun di Tugu Kujang sarta diteruskeun ka pawai ngaliwatan Jalan Otista saterusna ka Balèkota Bogor di Jl. Ir. H. Juanda No. 10.

Salila nikreuh ti Tugu Kujang anu pawèy mawa spanduk anu tulisanna Say No Tobbaco, Anti merokok baii umajak ka masarakat sangkan  eureun ngaroko. (Tria/Lani/Dadang HP)

Welasan Imah di Kalurahan Kencana Ruksak

Sakurangan hiji imah runtuh , sarta welasan nu sèjènna ruksak beurat, mangsa aya angin puyuh narajang wewengkon Kalurahan Kencana Kacamatan Tanah Sareal Kota Bogor, Rebo (3/6). Imah anu karuntuhan tangkal  ieu bogana Manta (50) warga RT 03 RW 06 Kelurahan Kencana anu pernahna di sabudeureun kebon warga, katinggang tangkal rambutan. Sanajan kitu, kajadian ieu teu nyababkeun ayana korban jiwa, tapi  korban ngarandapan karugian nepi ka mangpuluh-puluh juta. Ceuk  Manta mangsa imahna katinggang tangkal, dirina jeung kulawarga keur nyingkur di imah tatangga, sabab hujan gedè pisan, sawatara kaayaan imahna geus amoh.

“Kurang leuwih jam satengah tujuh peuting teu sakara-kara angin kacida gedèna, tangkal rambutan anu aya di hareupeun imah kuring runtuh sarta ninggang imah kuring,”sanggemna. Kajadian ieu langsung dilaporkeun ka Lurah Kancana Syafei, anu  saterusna  Kasi Trantribna Iyan Sopyan ngabèjaan Tim Tagana (Taruna Siaga Bencana) jeung Badan Penanggulangan Bencana Daerah (BPBD) Kota Bogor. Teu kungsi lila kurang leuwih  tabuh 21.00 WIB, Tagana jeung BPBD geus datang ka lokasi kajadian. Numutkeun Lurah Syafei, dirina geus ,marèntahkeun  ka RT jeung  RW pikeun ngajakan wargana ngalaksanakeun gotong royong ngabèrèskeun imah anu urug, Salian ti  imah Manta, aya 13  imah  warga sèjènna anu ruksak di tilu RW  nyaèta RW 06, RW 05  jeung  RW 03  ngalaman karuksakan. Tim Tagana anu datang ka tempat kajadian mere bantuan natura  mangrupa kadaharan simbut jeung nu lianna. Bantuan èta dipasrahkeun ku Ujiani  Salah sahiji Kasi di Tenaga Kerja, Sosial jeung  Transmigrasi (Disnakersostrans) Kota Bogor. (ISO/DADANG HP)