WARTA BASA SUNDA BOGOR: Syfa Lumpuh Salila 13 Taun

WARTA BASA SUNDA BOGOR: Syfa Lumpuh Salila 13 Taun: WARTABASAUNDA   Sani (36) warga Kampung Jampang RT 02 RW 1O, Desa Kalisuren Kac.   Tajurhalang Kabupaten Bogor, ukur ngageuri nempo a...

Syfa Lumpuh Salila 13 Taun

WARTABASAUNDA

 Sani (36) warga Kampung Jampang RT 02 RW 1O, Desa Kalisuren Kac.  Tajurhalang Kabupaten Bogor, ukur ngageuri nempo anakna Syarifah atawa

Syfa (14) anu teu walakaya, ngalaman lumpuh salila 13 taun. Numutkeun Sani, mangsa umur anakna sataun, kaayaanna walagri, kumaha wè budak saumuran sakitu, ngan saentas divaksin suntik dina pingpina anakna  jadi kitu.

“Saentas divaksin peutingana muriang, tuluy koma salila sapuluh poè, mangsa hudang  sakabèh tulangna jadi leuleus,”pokna  bari carindakdak nahan piceurikeun.   Salila sapuluh taun, saminggu sakali anakna ngalaman step, tong boroning dahar, pikeun nginum waè geus teu bisa. Lantaran taya kadaharan anu asup pisan, bari jeung teu tèga susu jeung kadaharan sabangsaning bubur tèh kapaksa kudu dijejelkeun.

“Sakuduna mah diinfus, tapi waragad pikeun ka rumah sakitna timana. Salaki kuring, Kang Anda ukur buruh wangunan. Pikeun ngubaran anak kuring anu cikal kapaksa kudu hutang injeum  diantarana nepi bank keliling sagala,”tegesna. Malah dina hiji waktu mah, kulantaran geus taya waradag pikeun ngubaran, sarta imahna ogè dina kaayaan darurat, salila sababaaha peuting kapaksa ngendong di kuburan emana dibarengan Syfa jeung adina.

“Kuring geus bingung pisan kudu ka saha deui sasadu. Iwal ti ka makam indung jeung minangsaraya ka Gusti Allah.” Ari tarèkah pikeun  ngubaran anakna, geus teu kaitung, ti mimiti ka Puskesma, rumah sakit, dokter, dukun, kyai, ka jalma-jalma piniter bari jeung kudu naèk angkot ngagandong nu gering.

“Sawatara bantuan ti Dinas Sosial Kabupaten Bogor, lain euweuh, tapi matak lieur. Mangsa aya nu masrahkeun loba pisan titipan caritaan. Engkè lamun aya nu nanya jumlah anu katarima sakitu nya,”pokna tèh. Sanajan kaayaan Syfa teu walakaya, teu bisa diuk-diuk acan teu bisa nyarita, Sani ngaku moal pegat-pegat narèkahan ngubaran, moal rèk putus pangharepan.

“Nu ngaranna indung mah geus pasti nyaah ka anak sarta hayang anakna walagri, cageur bageur, kitu ogè kuring,”Sanui nutup caritaan. (dhp)

Mama Arief Bakal Maju Dina Pamilihan Pupuhu DK3B

WARTABASASUNDABOGOR

Haji Arief Hidayat atawa Mama Arief Hidayat, ahli dongeng Sunda, negeskeuun bakal maju dina pamilihan pupuhu Dewan Kesenian jeung  Kabudayaan Kota Bogor (DK3B) anu bakal dilumangsungkan dina April nu bakal datang. Majuna ahli dongèng ieu geus pasti bakal ngaramèkeun jumlah calon pupuhu anu aya, ceuk basa dongèngna mah  kawas torolong hayam ti kolong. Numutkeun inyana, aya sababaraha seniman jeung budayawan sarta anggota DPRD Kota Bogor nu datang ka imahna, meredih sangkan dirina maju.

“Ulah henteu Ma, salametkeun DK3B, sabab tina calon anu bakal maju ayeuna, kahareupna angger moal harmonis, bakal aya pacogrègan. DK3B bakal moal buleud,”saur Mama Arief nirukeun ucapan anggota DPRD Kota Bogor, di bumina di wewengkon komplek paimahan Taman Yasmin Kacamatan Bogor Barat Kota Bogor, Ahad (20/3). Mama  Arief sorangan ngarasa yakin, yèn majuna dirina jadi pupuhu DK3B bakal loba nu ngarojong.

“Sim kuring geus nyiapkeun calon pangurus lamun tèa kapilih. Loba seniman jeung budayawan Bogor anu hade gawèna, rancagè, tara loba omong, hasil gawèna geus kanyahoan anu keur diajakan badami pikeun majukeun DK3B,”tegesna.

 Sakumaha dipikanyaho, kaayaan DK3B ayeuna, kaayaanna “status quo”, sabab pupuhu anu  geus kapilih teu bisa ditarima hasil pamilihinna. Dines Kebudayaan Pariwisata jeung Ekonomi Kreatif Kota Bogor, ahirna bakal ngalaksanakeun pamilihan deui. Tapi ceuk panitèn budaya, Cecep Thoriq, lamun anu geus milu pamilihan kamari milu deui, dihariwangkeun bakal paciweuh.

“Alusna mah aya inohong sèjèn anu miluan tur bisa ngararapih kaayaan anu ayeuna keur riweuh,”ceuk Cecep.  

Lantara Teu Dianggarkeun, Pangurus PWI Kota Bogor Rek Ngawangun Gedongna ku Swadaya

Pangurus PWI Kota Bogor ahirna mutuskeun bakal ngawangun kantor PWI di Jalan Kasehatan No. 4 Kacamatan Tanah Sareal Kota Bogor, anu ambruk sababaraha bulan kaliwat. Hal ieu diputuskeun mangsa meunang kapastian yèn Pemkot Bogor  teu nga-anggarkeun waragad pikeun ngawangun dina Anggaran Belanja Tambahan (ABT) taun 2015.  Numutkeun Ketua PWI Kota Bogor, H. Tarwono, mangsa gedong PWI ambruk loba para gegeden anu daratang ti mimiti Walikota, Wakil nepi ka Ketua DPRD Kota Bogor.

“Sakabèhna ngajangjikeun bakal mantuan ngawangun ku jalan ngasupkeun dina ABT taun 2015 ayeuna, tapi saentas dipaluruh tètèla teu dianggarkeun. Ahirna kuring jeung rèngrèngan pangurus sapuk bakal ngawangun ku jalan swadaya,”tegesna mangsa ngariung di kantor heubeul di Jalan Kasehatan Kota Bogor. Numutkeun pangurus sèjènna, salian ti teu dianggarkeun aya bèja yèn kantor PWI ieu bakal diwangun tapi dihancengkeun pikeun Badan Narkotika Nasional (BNN) Kota Bogor.

“Padahal jelas pisan dina prasasti anu teken ku Walikota Bogor anu ti heula, Bapak Suratman, kantor ieu pikeun PWI. Jadi lamu aya alih fungsi hartina èta pajabat teu nyahoeun sajarah,”teges salah saurang pangurus PWI Kota Bogor basa keur ngariung. PWI, ceuk èta pangurus, ngan  mènta kacindekan, naha bakal diwangun  deui atawa moal.

“Ulah digantung teu puguh atuh. Geus mah Pemkot Bogor teu nyadiakeun rohangan husus  wartawan pikeun kalancaran tugasna, anu aya ogè rèk dibikeun ka  nu sèjèn. Asa ku harianeun pisan,”tegesna (Red)  

Kencana Siap Jadi Panaratas Kota Bogor Bersholawat

WartaBasaSunda. TANAH SAREAL. Kalurahan Kencana Kecamatan Tanah Sareal Kota Bogor siap  naratasan Kota Bogor jadi Kota Bersholawat atawa Sholawatan. Hal ieu geus dibuktikeun ina unggal kagiatan Hari Besar Islam,  kawih  Sholawat Nabi jadi kabiasaab umat Islam di kalurahan anu ngawates jeung Desa Cilebut Barat Kabupaten Bogor. Dina Saptu (17/10/2015) peuting, magrèbu-rèbu umat Islam minuhan  pakarangan Masjid Asshurofa Kampung Kalimurni RW 01 Kalurahan Kencana. Kagiatan anu sasmitana “Kalimurni Bersholawat “ dilumangsungkeun dina raraga mapag taun anyar Islam Islam 1437 Hijriah. Acara anu ditaratas ku rumaja Kalimurni ieu, ngondang Habib Muhammad Mahdi Bin Hamzah Assegaf pingpinan Majlis Ta’lim Syababul Kheir.  Warga anu daratang loba kacida, salian ti minuhan masjid jeung pakarangan ogè nepi ka sisi jalan sarta bari sila husu macakeun sholawat ka  Nabi Agung  Muhammad SAW.

Kalimurni Bersholawat ieu diluuhan ku Lurah Kencana Syafei R,  Kasie Trantib Yan Sopyan, Ketua Lembaga Pemberdayaan Masyarakat (LPM) Surya,  Ketua RW 01 Kelurahan Kencana Abdul Malik, sajumlah ulama, kiayi,  inohong pamuda. karang Taruna sarta para santri  ti sababaraha Majlis Ta’lim. Numutkeun Ketua Hubungan antar Lembaga jeung CSR Karang Taruna Kac. Tanah  Sareal Agus, kabiasaan sholawatan di Kalurahan Kencana kudu terus dijaga jeung dilaksanakeun , sarta Kalurahan Kencana kudu jadi panaratas Kota Bogor Bersholawat. Sapamadegan jeung Agus, Muslim salah saurang inohong masarakat Kalimurni anu ogè Ketua RT 02, nyebutkeun yèn ku ngabiasakeun maca sholawat, insya Allag Kota Bogor bakal meunang kaberkahan ti Allah SWT. Sedengkeun Lurah Kencana, Syafei R dibarengan Kasi Trantibna, Yan Sopyan nètèlakeun kacida reueusna kana ayana kagiatan èta, sarta umajak ka nu haladir sangkan hijrah ka jalan nu leuwih hade. (Dadang HP)

Angklung SDN Polisi 4 Muka Acara Sosiaslisasi ti PWI

PWI Kota Bogor gawè bareng jeung Dewan Pers sarta Dinas Pendidikan Kota Bogor, ngalumangsungkeun Sosialisasi Undang-Undang Pers jeung Kode Etik Kewartawanan pikeun dunya pendidikan di Gedong Kamuninggading, Saptu (10/10). Kagiatan ieu dibuka ku Kepala Dines Pendidikan Kota Bogor, H. Edgar Suratman ku cara ngenclingkeun angklung dibarengan ku Kamsul Hasan ti Dewan Pers, sarta H. Tarwono Ketua PWI Kota Bogor sarta ditungtungan ku pintonan angklung ti SDN Polisi 4 Kota Bogor, anu mawakeun 2 lagu. Samèmèhna, para pamilon jeung nu hadir di gedong ieu, ngawih lagu wajib Indonesia Raya anu dipingpin ku Kepala SDN Polisi 4, Yayah Komariah.

Numutkeun Edgar, kagiatan sosialisasi kacida pentingna pikeun para kapala sakola jeung guru, kusabab dina wangkid kiwari geus ditetepkeun Undang-Undang Keterbukaan Informasi Publik (KIP) anu raket patalina jeung dunya jurnalistik.

“Mudah-mudahan ku ayana kagiatan ieu, nu ngokolakeun dunya pendidikan jadi nyaho kumaha nyanghareupan wartawan,” ceuk Edgar. Inyana ogè miharep ka nu encan miluan kagiatan sosialisasi sangkan miluan mangsa aya acara samodèl kitu deui, sarta mènta sangkan pihak panitia nyatetkeun sakola anu dina waktu ayeuna teu bisa milu. Sawatara èta, Ketua PWI Kota Bogor, H. Tarwono miharep kagiatan anu dilaksanakeun ku rèngrènganna aya mangpaatna, sarta nambahan pangaweruh pikeun guru jeung kapala sakola anu miluan kagaiatan dina poè èta.

“Kuring ogè ngarasa reueus sarta ngahaturkeun nuhun  ka Dines Pendidikan Kota Bogor, PWI Jawa Barat, Pihak Polres Bogor Kota sarta Dewan Pers,”sanggemna. Minangka panyatur dina sosialisasi ieu nyèta Kamsul  Hasan ti Dewan Pers, Uyun Ahdiat ti PWI Jabar sarta ti Polres Bogor Kota. (Dadang HP) .