Pasar Budaya di Kamuning Gading

Mangratus-ratus barudak sakola dasar di kota Bogor, diajak nongton film animasi sajarah Bogor. Kagiatan minangka bagian tina kalumangsungan Pasar Budaya 2015 anu tujuanna ngawanohkeun kabudayaan  jeung  sajarah Bogor. Acara bisa lumangsung hasil gawè bareng Kantin Bioskop Keliling jeung  Dinas Kebudayaan, Pariwisata jeung   Ekonomi Kreatif (Disbudparekraf) Kota Bogor. Numutkeun Kadisbudarekraf Kota Bogor, Shahlan Rasyidi acara pamuteran film di Gedong Kamuning Gading bakal lumangsung salia tilu poè nyaèta ti tanggal 7 April  nepi  9 April 2015. Hal èta dicaritakeun Shahlan mangsa muka cara dina Salasa (7/4/2015).

“Kagiatan Pasar Budaya salah sahiji tarèkah pikeun nambahan ambahan ka barudak sakola sangkan leuwih mikacinta ka Kota Bogor,”ceuk Shahlan. Inyana miharep ku ayana acara èta bisa ngipuk rasa mibanda barudak sakola kana budayana sorangan anu jadi jati diri bangsa, kukituna ngawanohkeun kasurtian satempat  leuwih hade mangsa keur barudak kènèh. Panga disebut Pasar Budaya, kusabab aya patalina jeung pamèran hasil karya barudak sakola kayaning kujang bogor, pakèaian adat sunda, totopong  sarta alat karinding. Sawatara èta Ketua Panitia Hammad Ahmed ti  Kantin Bioskop Keliling nètèlakeun yèn Pasar Budaya 2015  èta, mangrupa salah sahiji wujud progarn pangokolaan rinèka budaya sakumaha anu dipintonkeun di Gedong Kamuning Gading.  (Gus/Dadang HP)

 

Cara SDN Julang Mieling Hari Bumi

Dina raraga mièling Hari Bumi 2015  jeung  10 taunna SD Negeri Julang, dilaksanakeun Julang  Carnaval dina poè Saptu (4/4/2015).  Salian ti karanaval  acara ieu ogè diramèkeun ku fashion show anu ngamangfaatkeun bahan-bahan sèsa anu pamilo

nna ti SD jeung Taman Kanak-kanak. Sakurangna aya 44 urang miluan kagiatan ieu. Numutlkeun Kepala SD Negeri Julang, Indah Rosmana,  ku ayana kagiatan ieu, para murid dibèrè kasempatan pikeun nyalurkeun bakatna ogè ngamekarkeun kabisana dina ngokolakeun runtah atawa plastic jadi barang nu bisa dijual.

“Ku kituna diharepkeun kacerdasan barudak bisa mekar sorangan. Kagiatan ieu saluyu jeung program Bogoh ka Bogor anu ngaharepkeun sakumna warga Kota Bogor malirè kana kabersihan lingkungan sarta bisa ngaronjatkeun  Bogor jadi kota tujuan wisata,” ceuk Indah. Salian ti èta para murid ogè diajarkeun nyumbangka kalayan sukarèla anu mangrupa hasil bumi, diantarana sayur jeung bubuahan ka warga  nu ngabutuhkeun. Inyana miharep kagiatan èta bisa dilaksanakeun tuluy tumuluy  kusabab mibanda nilèy-nilèy positf pikeun barudak sakola (Humas/ Dadang HP)

Bima, Usmar Ngaliwet jeung Joged Bareng

Sataun mièling pamarèntahanna, Walikota Bogor, Bima Arya Sugiarto dibarengan Wakilna, Usmar Hariman ngalumangsungkeun patepung lawung jeung wargana, sakumaha anu dilaksanakeun di RW 9 jeung RW 11, Kalurahan Bubulak Kacamatan Bogor Barat, Kota Bogor, Minggu (6/5). Dina kasempetan èta Bima, Usmar dibarengan ku Kepala Dinas Kebersihan, Irwansyah  jeung Pertamanan sarta rèngrènganna, Camat Bogor Barat, Irwan Gumelar, Lurah Bubulak, Hermawan, anggota DPRD Kota Bogor, Mahpudi Ismail, sarta para pajabat sèjènna dahar liwet bareng jeung inohong sarta warga satempat. Dina kasempetan èta Bima jeung  Usmar ngabagikeun rupa-rupa hadiah ti mimiti DVD player, Rice Cooker, sterikaan ka warga nu bisa ngajawab patanyaanna. Numutkeun Bima, kagiatan èta kacida ngabungahkeun dirina, kusabab bisa jadi jambatan pikeun nganyahokeun pasualan-pasualan anu aya di masarakat kota Bogor. Sawatara èta,  Pupuhu Panitia Palaksana, Cecep Zakaria anu ogè anggota Tagana Kota Bogor, negeskeun yèn sumpingna Bima jeung Usmar ka Kampung Babakan, minangka bukti lamun aranjeunna teu mopohokeun wargana.

“Baheula mangsa keur ngamimitian kampanyeu, Pa Bima sareng Pa Usmar kungsi diajakan ka dieu, sarta jangji bakal datang deui lamun kapilih, tah ieu minangka buktina,”ceuk Cecep. Pikeun ngalumangsungkeun kagiatan èta, Cecep ngajak sababaraha lembaga anu aya di Kalurahan Bubulak, diantarana Kader PKK, Pos Yandu, ulama sarta nu lianna.  Pa Bima, sanggem Cecep kurang pati resepeun kana acara nu sifatna formal, kukituna ngahaja wujudna ngaliwet bareng jeung ngawangkong. Ayana kagiatan ieu dimangpaatkeun ku kader Pos  Yandu pikeun nanyakeun tunjangan pikeun kaderna, cara ngurus BPJS anu dianggap pabeulit, nepi ka bèas raskin anu gorèng kualitasna. Sedengkeun Lurah Bubulak, Hermawan negeskeun yèn samèmèh lumangsungna acara ngaliwat, dimimitian ku pangbukaan bank sampah di dua RW, RW 9 jeung 11.

“Insya ku ayana kagiatan ieu, masarakat di  dua RW ieu, bakal leuwih sumanget dina ngalaksanakeun kabersihan, kaamanan jeung katrengteman di lemburna sèwang-sèwangan,”tegesna. Salian ti babagi hadiah, Bima jeung Usmar ogè nyempetkeun ngawih jeung joged babarengan masarakat anu ngarariungna. (Dadang HP)

Bina dipoto jeung para kader

Pupuhu Pantia, Cecep Zarkasih

Bima Joged jeung Kader PKK sarta masarakat

poto bareng inohong

Tuang liwet bareng

Ngarojong #BogohkaBogor, Situ Gede Laksanakeun Sababaraha Kagiatan

Pikeun ngarojong program #BogohkaBogor, anu dihangkeutkeun ku Walikota Bogor, di Lapangan Heulang, Kacamatan Tanah Sareal sababaraha waktu kaliwat, Kalurahan Situ Gede anu dipingpin ku Andi SIP, ngalaksanakeun sababaraha program, diantaran fogging di RW 06 jeung RW 09, beberesih wahangan Cibenda di RW 03, sarta nguburkeun barang-barang urut anu geus teu kapakè, ogè ngahangkeutkeun Ronda di wewengkonna. Kagiatan ieu minangka gawè bareng jeung LPM Situ Gedè sarta RW tur RT di kalurahanna. Hal èta ditegeskeun ku Lurah Situ Gedè  mangsa fogging jeung ngubur barang-barang kurut, Saptu (4/5).

“Kagiatan ieu minangka gawè bareng jeung Lurah sarta  RW tur RW satempat,”ceuk Andi sawaktu ditanya ku Warta Basa Sunda mangsa keur ngalaksanakeun kagiatan.  Husus pikeun Ronda, sanggemna, minangka lèngkah pikeun ngungkulan ramèna bègal anu ayeuna keur maceuh di mana. Sallian ti èta, ayana ronda peuting, loba pisan gunana, lamun aya kajadian anu teu diharepkeun, atawa warga  Situ Gedè aya perlu bantuan, boh gering atawa rèk ngalahirkeun bisa mènta bantuan ka nu keur jaraga.  Program-program ieu, geus pasti meunang pangbagèa anu kacida hadèna ti  rèngrèngan  Lembaga Pemberdayaan Masyarakat (LPM) Situ Gedè sarta para RW jeung  RT-na. Numutkeun Ketua LPM Situ Gedè, Eman Sulaeman, dina urusan  pagawèan-pagawèan sosial jeung nu lianna,  Lurah Situ Gedè kawilang rancagè.

“Kawas ayeuna, sanajan keur perè atawa lain jam kantor, Pa Lurah turun langsung ngariksakeun kagiatan panyemprotan jeung nu lianna,” sanggem Eman.  Kalima sarupa ogè kaluat ti Ketua RW 03, Hamdani anu harita milu marengan kagiatan di RW sèjèn. Sakuduna, anu dipigawè ku Lurah  Situ Gedè ieu ditarurutan ku Lurah sèjènna. Sabab, ceuk Hamdani, lamun pamingpin turun langsung, salian ti nambah sumanget ka nu di handap, ogè bisa nganyahokeun pasualan-pasualan anu aya di wargana. (Dadang HP)